ABBIAA GUAZZON

Perché han ciamaa Abbiaa-Grass quell giò alla bassa,
L’è facil a capiss da tutt qui gent
Che sta in quell borgh grass, rich, o che ghe passa:
Ma de savè prusmà e tiramm in ment
Perché pœu a sto Abbiaa chi gh’han dii Guazzon,
Scusa vindant, ma mi son tropp tappon.

L’è on bell paesott poggiaa a ‘na collinetta.
Che fa bell ved guardandel dalla strada.
L’è de là in alt che l’œucc el se diletta
Stendendes giò a mezz dì alla gran spaziada;
E l’è de là ch’el ven fermaa a tramont
Dal Rosa e dal firon di olter gran mont.

Gh’è ca e bej vill postaa sulla collina
Dove ven fœu d’autun i Milanes
A fa la bella cera e a tœu grassina;
Gh’è on concert de campann che quej del paes
Se vanten che l’è el mej e ch’el fa i corna,
Sonand tutt i alter di paes d’intorna.

Gh’è fior de gioventù robusta e bella.
Gh’è dell sangu in di donn, negher cavej.
De bev pussee in di caliz che a scudella
Gh’è scabbi in di sò ronch e bon, e bej:
E gh’è che in scherz, se i ciamen billoran,
Hin scrocch però, e dan pont anca ai magnan.

Guaja, se a ‘n pover paes ghe dà el brutt cas,
De fa ona gambarada, vuna appenna;
Quell l’è l’asen di mosch, nol gh’ha pu pas,
Vuna sola gh’en razza ona donzenna;
E intant chi no gh’ha colpa la ghe tocca,
Come Adam col peccaa della soa gnocca.

Dsi quest aludend ai asnad tutt
Fibbiaa in di temp passaa a sto bell Abbiaa,
E che mi, come cronach, bej o brutt,
I cunti tal e qual che i’hoo pescaa,
Cert che sti gent, perché gh’han sal in zucca,
Faran el giœugh de Sorate in perucca.

Sto giœugh donca che ha fan on gran effetton,
L’è quest. Socrate fin da giovinett
L’ha dovuu, (perché in piazza) mett signon,
Quindi vedè i compagn a mai sta quiett,
Col trall de chi e de lì, giugà al volin…
E lu a biscà, ma a mai vedenn la fin.

Stuff, gnecc, s’el pensa lu on dell di?
Va in scœula prima di alter quai minutt,
E nel bon che squas tucc el je ved lì,
Comenza lu per primm a dass de butt
Col fa corr la perucca, a giugatà,
E obbligà i pussee matt a seguità.

Segutiaa sto giughett trii o quatter di
Fin’a stufiss ben pussee lor, che lu,
Han fenii lor a instà de piantà li:
E insci con sto ripiegh l’han seccaa pu;
Ripiegh dio-fece ai gent de Abbiaa Guazzon
Per romp e fa tasè i rompa mincion.

Donca per cuntà su, compagn che a Bust,
Quaiduna di parecc asnad dii e faa,
Diremm, senza tœu e mett, tutt per di el giust,
Che on temp han mandaa giò a Milan paraa
Dun carr tiraa da quatter bœu in sequella
Per tœu on taribal con la navisella.

Altra. A on resgiò, el curat ciama in dottrina:
I òper della misericordia, a vù,
Savii mò dimm quant hin? Bestia in cantina!
Rispond el primm, ma hin sett. - nò ch’hin de pu,
Repia el curat. – Ben des, l’alter anmò. –
Hoo capii, torna el pret, el savii nò.

Ma, hin giust quàttordes! – Quattordas? Biloren!
S’ahi fussan sett, o des, com’hoo dii mè,
Va là ancamò, el mè scior, l’andariss ben;
Ma quattordas hin tropp, nò i vuj santè;
E in del mè credo vegg gh’hal disi e al canti
Che me no vœuri fàgan stà inseè tanti.

Terza masnada o a di mej terza locada
L’è quella d’on paesan, che alla mattina
Copo avè col cazzuu faa la panadaa,
E avenn ben smorfii via ona tazzina,
L’è andaa al bosch per fa legna, ma el badee
Per folcia el s’è trovaa el cazzuu dedree.

E ultima, l cas de quand dopo bagnaa
I caudir in fonzion longo el päes,
Ciappaa da on temporal, me j’han cascina
In d’on fforno sugà, e li, ben intes,
Vist ch’hin deslenguaa tucc, toj chi, oh sciston!
Han dii, ch’è vanzaa appena i vermanon!

P.S. M’aveven dii che chi in Abbiaa Guazzon
No gh’era mezza industria; in scambi mò,
La gh’è, e l’è on lavoreri de botton
Ai quai ghe tegni molto, se de nò
Ris’ci a vedè andamm giò de tant in tant
Minga domà i calzon, ma anca i mudant.